wall street journal

Umuwi ako na kipkip ka sa gunita
lulan ng sinaid na bote ng Smirnoff
habang naglalayag sa ulap at sa usok
na hinitit na isang kaha ng Davidoff.
Gusto kong pagsilabin hanggang maging titis
ang puso kong nag-apoy sa init mo’t vodka
at tangayin ang abo ng hanging palayo
sa akit-halimuyak ng iyong Samsara.

Halos mabaliw ako na paglabanan
ang paisa-isang naghuhubad mong Kisses
nang bumigay ka sa tudyo ko’t pagbibiro
mananatili kang Choko-nut, hindi Hershey’s.
Humanga ako sa walang tigil mong kwento
sa napakarami mong mga connecting flights
upang maabot ang lahat ng pangarap mo
na tila ba’t ang tatak-blue seal at stateside.

Sa tulang ito kita babalik-balikan
pag tinawag kang muli ni Lady Liberty
magkaligaw-ligaw man sa pananaginip
sa hindi natutulog mo na New York City.
Ah, wala akong lakas ng loob at tapang
kilalanin si Dow Jones, maging si Uncle Sam
kung kaya’t aabangan ko na lamang lagi
ang paghahatid pabalik sa’yo ng Pan-Am.

Comments are closed.